اَعُوْذُ ۔ بِاللهِ ۔ ُ مِنَ ۔ الشَّیْطٰنِ ۔ الرَّجِیْمِ
میں پناہ مانگتا / مانگتی ہوں ۔ الله تعالٰی کی ۔ سے ۔ شیطان ۔ مردود
اَعُوذُ بِاللهِ مِنَ الشَّیطٰنِ الَّجِیْمِ
میں الله تعالٰی کی پناہ مانگتا / مانگتی ہوں شیطان مردود سے
اللہ تعالٰی کی مخلوقات میں سے ایک مخلوق وہ بھی ہے جسےشیطان کہتے ہیں ۔ وہ آگ سے پیدا کیا گیا ہے ۔ جب فرشتوں اور آدم علیہ السلام کا مقابلہ ہوا ۔ اور حضرت آدم علیہ السلام اس امتحان میں کامیاب ہو گئے ۔ تو الله تعالٰی نے فرشتوں کو حکم دیاکہ وہ سب کے سب آدم علیہ السلام کے آگے جھک جائیں ۔ چنانچہ اُن سب نے انہیں سجدہ کیا۔ مگر شیطان نے سجدہ کرنے سے انکار کر دیا ۔ اس لئے کہ اسکے اندر تکبّر کی بیماری تھی۔ جب اس سے جواب طلبی کی گئی تو اس نے کہا مجھے آگ سے پیدا کیا گیا ہے اور آدم کو مٹی سے اس لئے میں اس سے بہتر ہوں ۔ آگ مٹی کے آگے کیسے جھک سکتی ہے ؟ شیطان کو اسی تکبّر کی بنا پر ہمیشہ کے لئے مردود قرار دے دیا گیا اور قیامت تک کے لئے اس پر لعنت کی گئی ۔
اب شیطان نے اپنی اس ذلّت کا بدلہ لینے کی ٹھان لی ۔ سب سے پہلے آدم علیہ السلام اور اُن کی بیوی کو بہکا کر جنّت سے نکلوا دیا ۔ اور اُس نے اس بات کا اعلان کر دیا کہ میں قیامت تک آدم کی اولاد کو صحیح راستے سے ہٹانے کی کوشش کرتا رہوں گا۔ اس کے معنی یہ ہیں کہ شیطان ہمارا مستقل دشمن ہے ۔ اس لئے الله تعالٰی نے ہمیں حکم دیا کہ اس طرح الله کے حضور میں دُعا کریں ۔
" اے میرے رب میں آپ کی پناہ مانگتی/ مانگتا ہوں شیطان کے وسوسوں سے ۔ اے میرے رب میں آپ کی پناہ مانگتی / مانگتا ہوں اس سے کہ شیطان میرے پاس بھی آئے "
پیارے نبی حضرت محمد صلی الله علیہ وسلم نے ارشاد فرمایا۔ جس کا مفہوم یہ ہے کہ شیطان تمہارے رگ و ریشہ میں اس طرح اثر کرتا ہے ۔ جس طرح کہ خون تمام جسم میں دوڑتا ہے ۔ شیطان آدمی کو دیکھتا ہے مگر آدمی شیطان کو نہیں دیکھ سکتا ۔ نہ اس کے حملہ سے آسانی کے ساتھ بچاؤ کر سکتا ہے ۔ اس لئے ہر انسان کے لئے ضروری ہے کہ وہ شیطان کے اثر سے پناہ مانگے ۔
قرآن کریم میں ارشاد باری تعالٰی ہے ۔
فَاِذَا قَرَاْتَ الْقُرْاٰنَ فَاسْتَعِذْ بِاللهِ مِنَ الشَّیْطَانِ الرَّجِیْمِ۔
یعنی جب تم قراٰن کی تلاوت کرنے لگو تو الله تعالٰی سے پناہ مانگو شیطان مردود کے شر سے
قراٰن مجید کی تلاوت کے آداب میں یہ بات شامل ہے کہ تلاوت کی ابتداء میں
اَعُوْذُ بِاللهِ مِنَ الشَّیْطٰنِ الرَّجِیْمِ
پڑھا جائے ۔ تاکہ الله جلَّ شانُہ ہمیں اپنی پناہ میں لے لے ۔ اور اس نیک کام میں شیطان کو بہلانےاور پھسلانے کا موقعہ نہ ملے۔
اٰیات کی غلط تاویل سے معنوں کی حقیقت بدل جاتی ہے ۔ الله تعالٰی ہمیں ہر قسم کی گمراہیوں سے محفوظ رکھے ۔ آمین ۔۔
تبصرے