HAZARAT ADAM ALIHIS SALAM -1

                         حضرت آدم علیہ السلام

اللہ جلَّ شانہُ نےجب انسان کی تخلیق کا ارادہ فرمایا تو فرشتوں سے خطاب کرتے ہوئے فرمایا :بے شک میں زمین میں اپنا نائب (خلیفہ) بنانے والا ہوں

فرشتوں نے عرض کی، "کیا آپ زمین میں ایسی مخلوق بنائیں گے جو زمین میں فساد مچائے گی اور خون بہائے گی اورہم آپ کی تسبیح بیان کرتے ہیں آپ کی تعریف کے ساتھ اور آپ کی بزرگی بیان کرتے ھیں

اللہ تعالی نے فرمایا :بے شک میں خوب جانتا ہوں جو تم نہیں جانتے 

سورۃ بقرہ آیۃ 30

پھر اللہ جلَّ شانہُ نے آدم علیہ السلام کو سڑی ہوئی مٹی  کے سوکھے ہوئے گارے سےبنایا 

سورۃ الحجر آیۃ 26

اور فرشتوں سے کہا : جب میں اسے پورا بنا چکوں اور اس میں اپنی روح سے کچھ پھونک دوں تو تم سب اس کے آگے سجدے میں گر جانا - سورۃ الحجر آیۃ 29  

اللہ جلَّ شانہ نے حضرت آدم علیہ السلام کو ساری چیزوں کے نام سکھائے پھر انہیں فرشتوں کے سامنے پیش کیا  اور فرمایا : اگر تمہارا خیال صحیح ہے ( کہ خلیفہ بنانے سے زمین کا انتظام بگڑ جائے گا ) تو ذرا اِن چیزوں کے نام بتاؤ 

فرشتوں نے کہا : ہر عیب سے پاک تو صرف آپ کی ذات ہے ہم تو بس اتنا ہی علم رکھتے ہیں جتنا آپ نے ہمیں سکھایا ہے- حقیقت میں سب کچھ جاننے اور سمجھنے والا آپ کے علاوہ کوئی نہیں ہے