ہدایت ۔۔۔ لوگوں کے لئے ۔۔۔ اور روشن دلیلیں ۔۔۔ سے ۔۔ ھدایت ۔۔ اور حق وباطل میں فرق کرنے والا
هُدًى لِّلنَّاسِ وَبَيِّنَاتٍ مِّنَ الْهُدَى وَالْفُرْقَانِ
لوگوں کے لئے ھدایت اور ھدایت کی روشن دلیلیں اور حق کو باطل سے جدا کرنے والا
آیت کی ابتدا میں رمضان المبارک کی فضیلت واضح کرنے کے لئے الله تعالی نے بتایا کہ قرآن مجید آخری آسمانی کتاب اسی مہینے میں نبی کریم صلی الله علیہ وسلم پر اترنی شروع ہوئی ۔ اب یہاں قرآن مجید کی تین خصوصیات بیان فرمائیں ۔
ھُدًی ۔ ( ھدایت ) ۔ یہ کہ قرآن مجید تمام بنی نوع انسان کے لئے ھدایت کا سرچشمہ ہے ۔ ہر فرد اپنے خالق حقیقی اور زندگی کی صحیح منزل تک پہنچنے کے لئے صحیص راستہ صرف قرآن مجید ہی سے حاصل کر سکتا ہے ۔ قرآن مجید کے علاوہ راہنمائی کا ہر ذریعہ غلط ہو گا ۔ اس کے سوا ہر راہ گمراہی کی راہ ہو گی ۔ راہ راست کی طرف ھدایت صرف اور صرف قرآن مجید ہی دے سکتا ہے ۔
انسان کی زندگی کو مجموعی طور پر کامیابی سے گزارنے کے لئے اس کے ہر پہلو سے متعلق قرآن مجید نے ایسے قاعدے دئیے ہیں جو سیدھے راستے اور حقیقی منزل کی نشاندھی کرتے ہیں ۔ جیسا کہ اس آیت میں الله سبحانہ تعالی نے فرمایا ۔
ھُدًی للنّاس ۔ ( قرآن مجید تمام نوع انسانی کے لئے ھدایت ہے ) ۔
بَیّنٰتٍ مّنَ الھُدٰی ۔ ( ہدائت کی روشن دلیلیں ) ۔ یہ کہ قرآن مجید نے ہدایت اور راہنمائی کے تمام اصولوں اور ضابطوں کو اس قدر کھول کر بیان کیا ہے کہ کہ وہ بالکل صاف سہل اور آسان ہو گئے ہیں ۔ اور ہر شخص انہیں سہولت کے ساتھ سمجھ سکتا ہے ۔ چونکہ قرآن مجید کی خوبی "بَیّنٰت " ( کھل کھلے دلائل ہے ۔ اس لئے قرآن مجید کے اصول عام فہم ، سادہ اور قابل عمل ہیں ۔۔ کوئی بات عقل کے خلاف اور کوئی اصول ناقابل عمل نہیں ۔
اَلْفُرقَان ( حق کو باطل سے جدا کرنے والا) ۔ قرآن مجید کی تیسری خوبی یہ ہے کہ جو لوگ اس مقدس کتاب کو پڑھتے ہیں ان میں صحیح فیصلہ کرنے کی قوت پیدا ہو جاتی ہے ۔ وہ سچ اور جھوٹ ۔۔۔ صحیح اور غلط ۔۔۔ حق اور باطل ۔۔۔ ایمان اور کفر ۔۔۔ اصلاح اور سرکشی ۔۔۔ عبادت اور کفر میں فرق کرنے کے قابل ہو جاتے ہیں ۔ اچھے اور بُرے میں تمیز کر سکتے ہیں ۔ اس لئے کہ قرآن مجید کی صفت " اَلْفُرقَان ( حق و باطل میں تمیز کرنے والا ) ہے ۔
ایسی کتاب جس میں یہ تین خوبیاں ہوں ۔ اس کا ہر حکم انسان کے لئے اندگی کا پیغام نہیں تو اور کیا ہے ؟
اس کے ہر حکم میں ان گنت برکتیں اور حکمتیں بھری ہوئی ہیں ۔
کاش مسلمان الله جل شانہ کے اس پیغام کو خود بھی سمجھیں اور دُنیا کو بھی سمجھا سکیں ۔ اگر ہم دنیا کے کونے کونے میں الله تعالی کا کلام نہ پھیلا سکے تو یہ امانت میں خیانت ہو گی ۔
درس قرآن ۔۔۔ مرتبہ درس قرآن بورڈ
کوئی تبصرے نہیں:
ایک تبصرہ شائع کریں