سورة مائدہ ، روابط سورة مائدہ

روابط سورة المائدہ 
سورة المائدہ کو اپنی ماقبل سورتوں سے تین طرح کا ربط ہے ۔
ربط اوّل :- اسمی یا نامی 
سورة الفاتحہ سے سورة المائدہ تک سورتوں کا اسمی یا نامی ربط اس طرح سے ہے ۔

إِيَّاكَ نَعْبُدُ وَإِيَّاكَ نَسْتَعِينُ وَلاَ نَعْبُدُ وَلاَ نَسْتَعِیْنُ البَقَرَةَ کَمَا فَعَلَتِ الْیہُودُ وَالمُشْرِکُونَ وَلَا آلَ عِمرانَ کَمَا فَعَلَتِ النّصٰرٰی وَ نُؤَدّی حُقُوقُ النّساء ۔
اللّٰھمّ اَنْزِلْ عَلَینَا مَآئِدَةَ انعَامِکَ وَ رَحْمَتِکَ 

اے الله ! ہم صرف اور صرف تیری عبادت کرتے ہیں اور صرف تجھ ہی سے مدد مانگتے ہیں اور نہ ہم گائے کی عبادت کریں گے اور نہ ہم اسے پکاریں گے جیسا کہ یہود و مشرکین نے کیا اور نہ ہم آل عمران کی عبادت و استعانت کریں گے جیسا کہ نصاری نے کیا
اور ہم عورتوں کے حقوق ادا کریں گے ۔
اے الله ! ہم پر اپنے انعامات اور رحمتوں کا خوان نازل فرما

ربط ثانی :- 
سورة بقرہ میں وہ تمام مضامین بیان کیے گئے ہیں جو سارے قرآن مجید میں تفصیل سے ذکر کیے گئے ۔
توحید ، رسالت ، جہاد فی سبیل الله ، امور انتظامیہ
نیز سورة بقرہ میں نفی شرک فی التصرف ، نفی شرک فعلی اور نفی شفاعت قہری کو عقلی اور نقلی دلائل سے واضح کیا گیا ۔
سورة آل عمران میں شرک فی الدعا کی نفی کی گئی اور توحید اور رسالت پر علمائے اہل کتاب کے شبھات کا رد کیا گیا ۔
اس کے بعد سورة النساء میں امورِ انتظامیہ متعلقہ احکام ( احکام رعیت و احکام سلطانیہ ) کو تفصیل سے بیان کیا گیا اور درمیان میں تفصیل سے شرک کی نفی بھی کی گئی
اب سورة المائدہ اور سورة الانعام میں نفی شرک فعلی کو تفصیل سے ذکر کیا گیا اس کے پہلو بہ پہلو شرک فی التصرف کی نفی بھی مذکور ہے ۔

ربط ثالث :-

سورة النساء کے آخر میں فرمایا
​

يُبَيِّنُ اللهُ لَكُمْ أَن تَضِلُّوا وَاللهُ بِكُلِّ شَيْءٍ عَلِيمٌ

یہ احکام الله تم سے اسلئے بیان فرماتا ہے کہ بھٹکتے نہ پھرو اور الله ہر چیز سے خوب واقف ہے۔

اس لیے کفر و شرک کی گمراہی سے بچانے کے لیے سورة المائدہ میں شرک فعلی اور شرک اعتقادی کا تفصیل سے رد فرمایا ۔