إِنَّمَا ۔۔۔يَأْمُرُكُم ۔۔۔بِالسُّوءِ ۔۔۔وَالْفَحْشَاءِ ۔۔۔وَأَن
بے شک ۔۔۔ وہ حکم دیتا ہے تم کو ۔۔۔ برائی ۔۔۔ اور بے حیائی ۔۔۔ اور یہ
تَقُولُوا ۔۔۔ عَلَى۔۔۔ اللَّهِ ۔۔۔مَا ۔۔۔ لَا تَعْلَمُونَ۔ 1️⃣6️⃣9️⃣
تم کہو ۔۔۔ پر ۔۔۔ الله ۔۔۔ جو ۔۔۔ تم نہیں جانتے
إِنَّمَا يَأْمُرُكُم بِالسُّوءِ وَالْفَحْشَاءِ وَأَن تَقُولُوا عَلَى اللَّهِ مَا لَا تَعْلَمُونَ. 1️⃣6️⃣9️⃣
اَلسُّوآء ۔ ( برائی ) ۔ وہ چیز جو عقلا اور شرعا بری ہو ۔
اَلْفَحْشَآء ۔ ( بے حیائی ) ۔ وہ جسے اخلاق اور ادب نے نا پسندیدہ ٹہرایا ہے ۔ لفظ فحش اور فاحشہ اسی سے ہے ۔
اس آیت میں شیطان کی دو خصوصیات بیان کی گئی ہیں ۔
پہلی یہ کہ وہ ہمیشہ انسان کو برائی اور بے حیائی سکھاتا ہے ۔ اس سے کبھی بھی انسان کو فائدے کی امید نہیں رکھنی چاہئیے ۔ بلکہ شیطان کی فطرت ہی ایسی ہے کہ وہ سراسر برائی ، گندگی ، بے حیائی ، گمراہی اور نا پاکی میں آلودہ ہے ۔ اور دوسروں کو بھی آلودہ رکھنا چاہتا ہے ۔ ہر وقت کسی نہ کسی شرارت ، فساد ، فتنہ اور گڑ بڑ پر اکساتا ہے اور نیکی میں روڑے اٹکاتا ہے ۔ایسی تمام خواہشات اور کام جو انسانی برادری اور خود انسانیت کے لئے مہلک ہیں وہ سب برائی اور بے حیائی میں آجاتے ہیں ۔
سوسائٹی کے امن وامان کو خراب کرنا ، باہمی اخوت اور برادری میں تفریق پیدا کرنا ،اتحاد اور تعاون کی جڑ اکھاڑنا ، بندوں کے حق پورے نہ کرنا ، غرض تمام شرو فساد پھیلانے والے کام شیطانی ہیں ۔
شیطان کا دوسرا کام یہ ہے کہ وہ انسان کو ترغیب دیتا ہے کہ وہ اپنے پاس سے من گھڑت باتیں بتایا کرے ۔اور ظاہر یہ کرے کہ یہ الله تعالی کا حکم ہے ۔ حالانکہ الله جل شانہ ہرگز ان باتوں کا حکم نہیں دیتا ۔لیکن شیطان کی پیروی کرنے والے لوگ مال کی حرص ، دنیاوی طمع و شہرت ، عارضی فائدے اور نا پائیدار چیزوں کو حاصل کرنے کی خاطر یہ سب کچھ کر گزرتے ہیں ۔
یہودی علماء میں یہ مرض عام ہو گیا تھا ۔ وہعوام کو دھوکا دینے کے لئے اپنے فائدے کی باتیں کہہ کر الله تعالی سے مسوب کر دیتے تھے ۔ نتیجہ یہ نکلا کہ ان کے دین کی جڑیں کھوکھلی ہو گئیں اور وہ آئیندہ کے لئے ناکام ہو گئے ۔
ہمیں اس آیت سے سبق سیکھنا چاہئیے کہ نہ بدی اور بے حیائی میں حصہ لیں ۔نہ ہی جھوٹے مسائل گھڑ کر لوگوں کو سنائیں ۔ کیونکہ یہ دونوں شیطانی کام ہیں ۔
درس قرآن ۔۔۔ مرتبہ درس قرآن بورڈ
کوئی تبصرے نہیں:
ایک تبصرہ شائع کریں