پھر ارشاد ہوا اس کے احکام معلوم کرنے کے لئے قرآن مجید کی طرف پورے طور پر متوجہ ہونا چاہئیے ۔ جس کے برابر نہ کوئی کتاب موجود ہے ۔ نہ ہو سکتی ہے ۔ اس حقیقت کو سمجھانے کے لئے ایک سیدھا سادہ سوال تعجب کے انداز میں کیا کہ تم الله تعالی کا انکار کیسے کر سکتے ہو ؟ جب کہ تمہیں اپنے یا کسی جاندار کے پیدا کرنے یا مارنے پر کچھ بھی اختیار نہیں ہے ۔
کلام الله کی صداقت کے بارے میں سیدھی سادی دلیل یہ پیش کی کہ اگر کسی کو شک ہو کہ یہ الله تعالی کا کلام نہیں ہے بلکہ کسی انسان کا بنایا ہوا ہے تو وہ خود اس جیسی دس سورتیں ، دس نہیں تو تین سورتیں یا ایک ہی سورت بنا کر دکھا دے ۔ اکیلے یہ کام کرنا ممکن نہ ہو تو اپنے ساتھیوں فاضلوں ، ادیبوں کو ساتھ ملا کر کوشش کر دیکھے ۔
رکوع ختم اس بات پر ہوا کہ اے لوگو ! زمین پر ساری چیزیں تمہارے لئے ہی پیدا کی گئی ہیں اور آسمانوں کو بھی اسی لئے پیدا کیا گیا کہ سورج ، چاند ، ستاروں اور بارش کے ذریعہ تمہیں نفع پہنچے ۔ اس لئے تم اپنے مرتبہ کو پہچانو ۔ اور وہ کام کرو جو تمہارے شایانِ شان ہو ۔
اگر ہم یہ ایت سمجھ لیں اور دُنیا کی اقوام کو ذہن نشین کرا سکیں ۔ تو یہ نوع انسانی کی بہت بڑی خدمت ہو گی ۔ اگر مشرکوں اور بُت پرستوں کو اس حقیقت کا پتہ لگ جائے ۔ کہ زمین وآسمان اور کُل کائنات انسان کے لئے بنی ہے تو یہ کیسے ممکن ہے کہ ان سب چیزوں کا مالک اور تمام کائنات سے افضل انسان اپنےسے کمتر اشیاء کے سامنے سجدہ کر سکے ۔
جو رکوع اس کے بعد شروع ہو گا ۔ اس میں خاص طور پر بیان کیا گیا ہے کہ انسان کا مرتبہ کیا ہے ۔ اور وہ اس دُنیا میں کامیاب زندگی کس طرح گزار سکتا ہے ۔ تاکہ انسان اپنی عظمت اور شان کا صحیح اندازہ کرے اور کوئی ایسا کام نہ کرے جس سے وہ اپنے اُونچے مرتبے سے گر جائے ۔
درس قرآن ۔۔۔ مرتبہ درس قرآن بورڈ
کوئی تبصرے نہیں:
ایک تبصرہ شائع کریں