وَإِذْ۔ قَالَ رَبُّكَ لِلْمَلَائِكَةِ إِنِّي
اور جب ۔ اس نے کہا ۔ تیرا رب ۔ فرشتوں کو ۔ بےشک میں
جَاعِلٌ فِي الْأَرْضِ خَلِيفَةً ط
بنانے والا ۔ میں ۔ زمین۔ ۔ نائب
وَإِذْ قَالَ رَبُّكَ لِلْمَلَائِكَةِ إِنِّي جَاعِلٌ فِي الْأَرْضِ خَلِيفَةً ط
اور جب تیرے رب نے فرشتوں سے کہا کہ میں زمین میں ایک نائب بنانے والا ہوں ۔
مَلٰئِکَۃ۔ ( فرشتے ) مَلک کی جمع ہے ۔ یہ لفظ الوک سے نکلا ہے ۔ جس کے معنی ہیں پیغام پہنچانا ۔ فرشتوں کو ملائکہ اسی لئے کہا جاتا ہے کہ افضل ملائکہ کا کام پیغام پہنچانا ہے ۔ ملائکہ نوری مخلوق ہیں وہ گناہوں سے پاک ہوتے ہیں اور الله تعالی کے حکموں کی نافرمانی نہیں کرتے ۔
قرآن مجید میں فرشتوں کے بارے میں الله تعالی کا فرمان ہے ۔
لاَ یَعْصُوْنَ اللهَ مَا اَمَرَھُم وَ یَفْعَلُوْنَ مَا یُؤْمَرُوْنَ
وہ الله تعالی کے حکموں کی نافرمانی نہیں کرتے اور وہی کچھ کرتے ہیں جو انہیں حکم دیا جاتا ہے ۔
خلیفه ۔ ( نائب ) خلیفۃ الله وہ ہے جو زمین پر الله تعالی کی شریعت کی حکومت قائم کرے ۔ اس سے یہ بھی ظاہر ہو گیا کہ انسان کو الله تعالی کی طرف سے جو قوتیں اور طاقتیں ملیں گی وہ دنیا میں الله تعالی کی خلافت قائم کرنے کے لئے بالکل ٹھیک ہوں گی ۔
پروردگارِ عالم وہ ہے جس نے زمین وآسمان اور تمام کائنات کو پیدا کیا ۔ اس کائنات میں ایک طرف زمین کی تمام چیزیں آجاتی ہیں ۔ مثلاً نباتات، جمادات ، حیوانات ، پہاڑ، دریا ، نہریں ، چشمے وغیرہ ۔ دوسری طرف آسمانوں کو بھی لیجئے اور ان تمام چیزوں کو شامل کیجئے جو ان سات آسمانوں کے اندر پیدا کی گئی ہیں ۔ الله تعالی خوب جانتا ہے کہ زمین وآسمان کی تمام چیزوں کے پیدا کرنے میں کیا حکمت ہے ؟
اس آیۃ میں اور اس کے بعد کی آیات میں ان سوالات کا جواب بیان ہوا ہے کہ حضرت آدم علیہ السلام کی پیدائش کیوں ہوئی ؟ اس مٹی کے پُتلے کو کس غرض سے بنایا گیا ؟ اور اس کا مقصدِ حیات کیا ہے ؟
جب الله تعالی نے زمین وآسمان اور اُن کے درمیان کی تمام چیزوں کو بنایا ۔ چاند سورج ، ستارے ، دریا اور پہاڑ اپنے اپنے کام پر لگ گئے ۔ تو الله تبارک و تعالی نے فرشتوں سے خطاب فرمایا کہ اب وقت آگیا ہے کہ جس کے لئے یہ چیزیں بنائی گئی ہیں وہ بھی سامنے آجاۓ یعنی یہ کہ میں اس زمین پر اپنا ایک خلیفہ بنانا چاہتا ہوں جو ان تمام چیزوں کو اپنے قبضے میں لائے گا ۔ اور دُنیا میں الله تعالی کے منشا کو پورا کرے گا ۔ اس کی نیابت اور خلافت کا حق ادا کرے گا ۔ اور اس کے احکام کا نفاذ و اجراء کرے گا ۔
درس قرآن ۔۔۔مرتبہ درس قرآن بورڈ
کوئی تبصرے نہیں:
ایک تبصرہ شائع کریں