صُمٌّ ۔ بُكْمٌ ۔ عُمْيٌ ۔ فَهُمْ ۔ لَا ۔ يَرْجِعُونَ. 1⃣8️⃣
بہرے ۔ گونگے ۔ اندھے ۔ پس وہ ۔ نہیں ۔ لوٹیں گے
صُمٌّ بُكْمٌ عُمْيٌ فَهُمْ لَا يَرْجِعُونَ. 1⃣8️⃣
وہ بہرے گونگے ، اندھے ہیں وہ نہیں لوٹیں گے ۔
صُمٌّ ۔ بہرے ۔ اس کا واحد اصم ہے ۔ جس کے معنی ہیں بہرہ ۔ منافق اگرچہ ظاہری طور پر بہرے نہیں ہیں ۔ لیکن انہیں بہرہ اس لئے کہا گیا ہے کہ اسلام کی حق باتیں سنتے اور ٹال دیتے ہیں ۔ اور سُنی بات کو اَن سُنی کر دیتے ہیں ۔ گویا وہ بہرے ہیں کچھ سُنتے ہی نہیں
بُکْمٌ ۔ گونگے ۔ یہ ابکم کی جمع ہے جس کے معنٰی ہیں گونگا ۔ اگرچہ ان لوگوں کی زبانیں تو موجود ہیں ۔ لیکن سچی بات پوچھنے سے گریز کرتے ہیں ۔ اور حق بات کا اقرار نہیں کرتے ۔ گویا ان کے منہ میں زبان ہی نہیں ہے ۔
عُمْیٌ ۔ اندھے ۔ یہ اعمی کی جمع ہے ۔ جس سے مراد ہے اندھا آدمی ۔ انہیں اندھا اس لئے کہا گیا ہے کہ آنکھیں رکھنے کے باوجود الله تعالی کی نشانیاں دیکھ کر قبول نہیں کرتے ۔
اس آیہ میں منافقوں کے اعمال کا نتیجہ بیان کیا گیا ہے ۔ وہ لوگ اسلام کی روشنی ظاہر ہو جانے کے باوجود کفر کے اندھیروں میں پڑے رھے ۔ دُنیاوی فائدوں ، ذاتی غرضوں ، نفسانی خواہشوں کی پیروی میں انہوں نے اچھے اور بُرے کی تمیز نہ کی ۔ جس طرح قدرتی قاعدے کے تحت آگ میں ہاتھ ڈالنے سے ہاتھ جل جاتا ہے ۔ اسی ان لوگوں کی ضد اور جان بوجھ کر گمراہی اختیار کرنے کی وجہ سے حق کو پہچاننے کی تمام قوتیں ضائع ہو گئیں ۔ کُفر ان پر غالب آ گیا ۔ وہ اسلام کی روشنی سے محروم ہو گئے ۔ الله تعالی نے ان کی بد اعمالیوں کی وجہ سے روشنی کو سلب کر لیا ۔ اور وہ اندھیروں میں بھٹکنے لگے ۔
نیکی اور بدی کی تمیز اُٹھ جانے کا لازمی نتیجہ یہ ہوا کہ وہ حق کی آواز سننے کے قابل نہ رہے ۔ اُن کی زبانیں گونگی ہو گئیں وہ کسی سے راہ حق دریافت نہ کر سکے ۔ اُن کی آنکھیں اندھی ہو گئیں کہ اسلام کی روشنی انہیں نظر نہ آئی ۔ اور الله تعالی کی نشانیاں ان پر کوئی اثر نہیں کرتیں ۔
علم حاصل کرنے کے تین ظاہری ذریعے ہوتے ہیں ۔ کان زبان اور آنکھ ۔ کبھی انسان دوسروں کی باتیں سُن کر بعض چیزوں کا علم حاصل کرتا ہے ۔ کبھی زبان سے پوچھ کر معلوم کرتا ہے ۔ اور کبھی آنکھ سے دوسری چیزوں کو دیکھتا ہے ۔ لیکن منافق اپنی ضد اور ہٹ دھرمی کی وجہ سے یہ تینوں ذریعے کھو بیٹھتا ہے ۔ اس لئے اب اس بات کی کوئی امید نہیں کہ وہ کفر سے اسلام کی طرف یا اندھیرے سے روشنی کی طرف واپس آئے گا ۔
درس قرآن ۔۔۔۔ مرتبہ درس قرآن بورڈ
کوئی تبصرے نہیں:
ایک تبصرہ شائع کریں