اور قائم رکھے ۔۔۔ نماز ۔۔ اور اداکرے ۔۔۔ زکوۃ
وَأَقَامَ الصَّلَاةَ وَآتَى الزَّكَاةَ
اور نماز قائم رکھے اور زکوۃ دیا کرے
پچھلے دو سبقوں سے یہ بیان چلا آرہا ہے کہ نیکی کی اصل اور سچی روح یہ نہیں کہ انسان کسی خاص سمت کو مقدس جان کر اس کی طرف منہ کرکے عبادت کرے بلکہ نیکی کی حقیقی روح عقیدوں کی درستی ۔ معاملات کی صفائی ۔ عبادتوں کے بجا لانے ۔ اخلاق کے سنوارنے اور ان کاموں کے کرنے میں ہے جو قرآن مجید بیان کرتا ہے ۔ یعنی انسان کے عقائد وہی ہونے چاہئیں جن کا الله تعالی اپنی کتاب مبین میں تقاضا کرتا ہے ۔ اور انسان دوسرے انسانوں سے اسی طرح پیش آئے جس طرح شریعت ھدایت کرتی ہے ۔
عقائد اور مالی قربانی کے بعد الله تعالی نے نیکی کے دوسرےحصے یعنی عبادتوں کا ذکر کیا ہے ۔ عبادات میں سب سےبڑی عبادت بدنی اور مالی قربانی ہے ۔ بدنی عبادت کی صورت نماز ہے اور مالی عبادت کی صورت زکوۃ ہے ۔ نماز کی بہت سی خوبیاں خود قرآن مجید میں متعدد مقامات پر بیان کی گئی ہیں ۔اور احادیث میں بھی اس کے تذکرے جا بجا ملتے ہیں ۔
نماز اسلامی معاشرے کی ایک اہم کڑی ہے۔نماز انسان کو بدی اور بے حیائی سے روکتی ہے۔ نافرمانی سے باز رکھتی ہے۔۔ نماز مؤمن کی معراج ہے ۔ روحانی ، اخلاقی اور سماجی زندگی میں انسان کو تقویت بخشتی ہے ۔
مالی عبادات میں زکوٰۃ سب سے بنیادی عبادی ہے۔ہر صاحب استطاعت پر فرض ہے کہ وہ سال میں ایک مرتبہ اپنی دولت کا اڑھائی فیصد حصہ الله کی راہ میں مستحق لوگوں میں نکال دے ۔الله جل شانہ کی مقرر کی ہوئی یہ زکوٰۃ اس قدر ضروری اور مفید ہے کہ اگر مسلمان اس کی پوری پابندی کریں تو امت میں کوئی شخص فاقے نہیں مر سکتا ۔
روزگاری کے ہاتھوں تنگ آ کر خود کشی کی نوبت نہیں آ سکتی ۔ کوئی دربدر بھیک نہیں مانگ سکتا ۔
ہمارے معاشرے میں بے راہ روی ۔ تنگدستی ۔بے بسی اور زبوں حالی نہ رہے ۔ ساری امت مجموعی طور پر مضبوط ہوجائے ۔ امن فروغ پائے اور ترقی کی راہیں کھل جائیں ۔
قرآن مجید میں تقریبا ہر جگہ صلوٰۃ اور زکوٰۃ کا ذکر ساتھ ساتھ آیا ہے۔اگر وہ آیات جمع کی جائیں جن میں صلوۃ و زکوۃ کے مسائل ۔ احکام ۔اشارے یا تذکرےموجود ہیں تو ان کی مجموعی تعداد تین سو سے زیادہ ہے ۔ اس سے ظاہر ہے کہ اسلام میں ان دونوں فرائض کی حیثیت کس قدر اونچی اور اہم ہے۔ ان ارکان کی بجاآوری اور باقاعدگی کے بغیر اسلامی سوسائٹی کا تصور ہی پیدا نہیں ہوتا ۔ چنانچہ ان سے غافل مسلمانوں کو فاسق " اورمنکر کو دائرہ اسلام ہی سے خارج ہیں سمجھا جاتا ہے
درس قرآن ۔۔۔ مرتبہ درس قرآن بورڈ
کوئی تبصرے نہیں:
ایک تبصرہ شائع کریں