بَدِيعُ ۔۔۔۔۔۔ ۔۔ السَّمَاوَاتِ ۔۔۔ وَالْأَرْضِ ۔۔۔۔۔ ۔۔ وَإِذَا
ابتداء سے پیدا کرنے والا ۔۔۔ آسمانوں ۔۔۔ اور زمین ۔۔۔ اور جب
قَضَى ۔۔۔۔۔۔ أَمْرًا ۔۔۔۔۔۔۔۔ ۔ فَإِنَّمَا
فیصلہ کرتاہے ۔۔۔ کام ۔۔۔ پس بے شک
يَقُولُ ۔۔۔ لَهُ ۔۔۔۔ ۔۔ كُن ۔۔۔۔۔۔ فَيَكُونُ۔ 1️⃣1️⃣7️⃣
وہ کہتا ہے ۔۔۔ اس سے ۔۔۔ ہو جا ۔۔۔ پس وہ ہو جاتا ہے
بَدِيعُ السَّمَاوَاتِ وَالْأَرْضِ وَإِذَا قَضَى أَمْرًا فَإِنَّمَا يَقُولُ لَهُ كُن فَيَكُونُ. 1️⃣1️⃣7️⃣
ابتدا سے زمین اور آسمان کا پیدا کرنے والا ہے جب کسی کام کا فیصلہ کرتا ہے تو یہ فرماتا ہے کہ ہو جا۔ پس وہ ہو جاتا ہے ۔
بَدِیْعٌ ۔ ( بغیر مادے کے اور بغیر نمونے کے پیدا کرنے والا ) یہ لفظ "بدع "سے بنا ہے ۔ لفظ۔ ابداع " بھی اسی سے نکلا ہے ۔ جس کے معنی ہیں نئے سرے سے بنانا ۔ مادے کے بغیر نیست سے ہست کرنا ۔ نمونے کے بغیر کوئی چیز بنا دینا ۔
بدیعٌ سے مراد ہے ایسا موجد اور صنّاع جو حقیقی معنی میں پیدا کرنے والا اور ایجاد کرنے والا ہے ۔ جسے نہ کسی آلے کی ضرورت ہے نہ کسی مال و مسالہ کی ۔ نہ وہ کسی نمونے کا محتاج ہے نہ کسی استاد کا ۔ ہر چیز خواہ اس کا وجود اور نمونہ پہلے موجود ہو یا نہ ہو ۔ وہ اسے وجود بخشنے والا ہے ۔زمین و آسمان اور کائنات کی ہر شے اسی نے پیدا کی ہے ۔
اس آیت میں مشرک قوموں کے غلط عقیدوں کو رد کیا گیا ہے ۔ ان لوگوں کا خیال تھا کہ مادہ پہلے سے کسی نہ کسی شکل میں موجود تھا ۔بس اسے الله نے ترتیب و ترکیب دے کر کائنات کو پیدا کیا ہے ۔
الله جل شانہ نے یہاں اپنی صفت بدیع۔ بتا کر فرمایا ہے کہ صرف اسی کی ذات قدیم ، ازلی و ابدی ہے ۔اس نے تمام موجودات کو ایجاد کیا ہے ۔ جن کا پہلے بالکل کوئی نمونہ موجود نہ تھا ۔ زمین و آسمان اور کائنات کی ہر شے کو اسی نے نیست سے ہست کی شکل دی ہے ۔ اس کے لئے ہر چیز کو بغیر نمونہ کے اور بغیر مادے کے پیدا کرنا بہت آسان بات ہے ۔ سبحان الله
کُن فَیَکُوْنَ - ( ہو جا ۔ پس وہ ہو جاتا ہے ) ۔ الله تعالی کو کائنات کی تخلیق اور ایجاد میں اسباب اور وسائل کی ضرورت نہیں ۔ صرف اس کا حکم اور اشارہ کافی ہے ۔ اسی حقیقت کو اس مختصر سے جملے میں بیان کیا گیا ہے ۔
اس آیت سے پتہ چلتا ہے کہ الله تعالی ہی قدیم ہے ۔ ایک وقت ایسا تھا جب اسی کا وجود تھا اور باقی کچھ بھی موجود نہ تھا ۔ اسی نے اپنے ارادے سے ان سب کو ایجاد کیا ۔ اسے نہ کسی شریک کار کی ضرورت ہوئی اور نہ کسی معاون اور مددگار کی ۔ وہی تمام چیزوں کو نئی شکلیں دیتا ہے ۔
مادہ پرست لوگوں کا یہ عقیدہ غلط ہے کہ وہ کسی کا محتاج ہے یا اسے کسی کی ضرورت ہے ۔
تبصرے