يَا أَيُّهَا ۔۔ الَّذِينَ ۔۔۔ آمَنُوا ۔۔۔ اسْتَعِينُوا۔۔۔۔ بِالصَّبْرِ
اے ۔۔ وہ لوگ ۔۔ ایمان لائے ۔۔ مدد مانگو ۔۔ ساتھ صبر کے
وَالصَّلَاةِ ۔۔۔ إِنَّ ۔۔۔ اللَّهَ ۔۔۔ مَعَ ۔۔۔ الصَّابِرِينَ۔ 1️⃣5️⃣3️⃣
اور نماز ۔۔ بے شک ۔۔۔ الله تعالی ۔۔۔ ساتھ ۔۔۔ صبر کرنے والے
يَا أَيُّهَا الَّذِينَ آمَنُوا اسْتَعِينُوا بِالصَّبْرِ وَالصَّلَاةِ إِنَّ اللَّهَ مَعَ الصَّابِرِينَ. 1️⃣5️⃣3️⃣
اے ایمان والو۔ صبر اور نماز کے ساتھ مدد مانگو بے شک الله تعالی صبر کرنے والوں کے ساتھ ہے
اِسْتَعِینُوْا ۔ ( مدد چاہو ) ۔ اس کا مصدر استعانت ہے ۔ اور مادہ۔ "عون " ہے ۔ اس کے معنی مدد کے ہیں ۔
الله تعالی نے مسلمانوں کو ایک بہت بلند منصب بخشا یعنی یہ کہ وہ دنیا سے شرک اور بُت پرستی دور کریں گے اور اس گوشہ گوشہ میں توحید کا پیغام پہنچائیں گے ۔اور دنیا کی اقوام کی ہدایت اور پیشوائی کا فریضہ انجام دیں گے ۔ اس ذمہ داری کو سنبھالنے کے لئے ضروری تھا کہ مسلمانوں میں اعلی اوصاف اور اخلاق حسنہ پیدا کئے جائیں ۔
ان میں سے تین کا ذکر ہو چکا ۔ یعنی یہ کہ
مسلمان الله کی اطاعت و عبادت میں سرگرم رہیں
اس کی دی ہوئی قوتوں کو صحیح مواقع پر اس کے حکم کے مطابق استعمال کریں
اس کی نعمتوں کی ناشکری اور نا قدری نہ کریں
اب یہاں الله تعالی کی مدد حاصل کرنے کے دو طریقے ارشاد فرمائے ہیں
اوّل یہ کہ ۔۔۔ مشکلات اور مصیبتوں پر صبر کرو
دوم یہ کہ نماز باقاعدگی سے ادا کرتے رہو
ہر مقصد کے حصول میں تکلیفوں اور مصیبتوں کا پیش آنا لازمی ہے ۔ اس لئے مصیبتوں اور رکاوٹوں کی بنا پر اپنے نصب العین کو نہ چھوڑنا۔ صبر ہے
صبر ۔۔۔ برداشت اور مقابلے کی طاقت
تنگی اور نا خوشگواری کی حالت میں اپنے آپ کو گھبراہٹ سے روکنا
مشکلات اور تکالیف کا ہمت اور ثابت قدمی سے مقابلہ کرنا
نفسانی خواہشات کو عقل پر غالب نہ آنے دینا
نماز کی حقیقت یہ ہے ۔ کہ الله جل شانہ کے ذکر و فکر سے روح کو قوت ملتی ہے
جس جماعت میں یہ دو قوتیں پیدا ہو جاتی ہیں وہ کبھی ناکام نہیں رہ سکتی
اس کے بعد یہ فرمایا ۔ جو لوگ اس مقصد کی تکمیل میں پیش آنے والی مشکلات پر صبر کریں گے ۔ انہیں الله تعالی کی خاص معیت اور رفاقت نصیب ہو گی ۔ اور ظاہر ہے جس فرد یا جماعت کے ساتھ الله تعالی خود ہو وہ کبھی اپنے مقصد میں ناکام نہیں ہو سکتی ۔ ہمیں اپنے اندر یہ صفتیں پیدا کر لینی چاہئیں ۔ اور دعوت و تبلیغ میں سرگرم ہو جانا چاہئیے ۔
کوئی تبصرے نہیں:
ایک تبصرہ شائع کریں